NUPA HLIM LOVIN A NGHAWNG

SAM 127:1
Lalpan in a sak loh chuan, A satute chuan an thawk rim thlâwn mai a ni; Lalpan khawpui a vawn ṭhat loh chuan, A vêngtu chu a meng thlâwn mai a ni.

Nupa hlim lo boruak chuan chhûngkaw boruak a tichhia a, naupangin inchhûng nuam an ti lo va, khawlaiah leh mi inah an lêng tam a, chu chuan anmahniah nun ṭha lo a hring chhuak leh ṭhin. Nupa hlim lohna hian inṭhen a chawh fo va, chu chuan chhûngkaw kehchhia a lo hring chhuak ṭhin a. A rah chu khawtlâng leh ram tân pawha hnawksak mi sual puntîr a ni mai. Eng ang nupa nge kan nih? tih hi inen lêt fo a ngai a nia!

Zûk leh hmuam te, zu leh drugs te hi nupa kâr boruak tichhetu a tling a. Puar leh fânna ni lova sum leh tha tam tak sênna a nih bâkah, mihring hrisêlna rûksaktu a ni a. Hrisêlna a chhiat chuan nupa kârah pawh hlim a har a, phâk chin rawngbâwlnaah pawh tel ve a tibuaithlak zo vek ṭhin.