RAMHUAI

LUKA 8:30
Tin, Isuan, “I hming eng nge ni?” tiin a zâwt a. Tin, ani chuan, “Nuaia,” a ti a (a kawchhûnga ramhuai tam tak an luh avângin).

Kan Bible-ah hian ‘ramhuai’ tih hi vawi 123 vêl a chuang a. Thuthlung Hluiah aiin Thuthlung Tharah ramhuai chungchâng sawina kan hmu tam zâwk a, Chanchin Ṭha hmasa pathum – Matthaia, Marka leh Luka ziakah te hian a lang tam zual a ni.

Ramhuaiho hian hnathawh dân leh mawhphurhna chi hrang hrang an nei ve niin a lang. Mihringah pawh ṭawng theih lohtîr zâwng te, âttîr zâwng te, phûngzâwltîr zâwng te pawhin an thawk a. Zû, drugs, hurna, sum ngainatna leh thil dang dang zâwnga thawk pâwlte pawh an awm niin a hriat bawk. Ramhuaiho hian mihring chunga thiltihtheihna eng emaw chen chu an nei ve a; mahse, Lal Isuan a hneh tawh an nih avângin ringtu tân chuan hlauh tûr a ni lo. Isua hming kan lamin ramhuaiho an tlânchhe ṭhin a ni. Ramhuaiho hi Lal Isua hminga hau ṭhin tûr an ni. Ramhuai hlau chuan mahniah inen fiah tûr a nei a ni ṭhîn.