INNGAIHTLÂWMNA

PHILIPPI 2:7-8
Mihringte anga lo piangin, bawih angah a insiam a, amah leh amah a intitlâwm ta zâwk a. Tin, mihring anga lo awmin a inngaitlâwm a, thi khawp hiala thu zâwmin a lo awm ta a, krawsa thihna ngei chu.

Inngaihtlâwmna hi tawitea hrilhfiah a har hlê. Thuawihna te, dawhtheihna te, thuhnuairawlhna te, insûmtheihna te leh inpêkna te hi a keng tel vek a. A ṭûl dân ang zela dinhmun sâng zâwk aṭanga tlâkthlâk ngam te, dawihzep vâng ni lova a ṭûl avânga tlâwm zâwk ngam te, dawh a ṭûl huna dawhtheih te, mahni nihna anga lan a ṭûl pawha lan mai ngamna ang chi hi inngaihtlâwmna ze langsâr zualte an ni awm e.

A ropuina zawng zawng hlîp a, vân aṭanga lei sual thima lo kal, mite rawngbâwlsaktu leh thih thlenga rinawm taka a Pa thu zâwmtu, Isua Krista nun leh chêt dân zawng zawng kha inngaihtlâwmna awmzia sawifiahna ṭha ber a ni a. Hei hi Paula pawhin nei ve tûra min duhsak êm êm chu a ni.