RUALBANLOTE NGAIHSAK

EXODUS 4:11
Tin, Lalpa chuan a hnênah, “Mihring kâ hi tu siam nge ni a, ṭawngtheilo te, bengngawng te, mitvâr te, mitdel te pawh hi tu tih nge ni? Kei Lalpa hian a ni lo vem ni?

Tun hma deuh chuan rualbanlote sawi nân ṭawng mawi lo pui pui – mi â tih te, mi ang lo tih te, mi chhawih tih te, piang sual tih te kan hmang langsâr hle ṭhin a. Tunah chuan an nihna sawi fiah tho sia sawi dân mawi zâwk – rualbanlo tih te leh vohbik tih te kan hmang langsâr ta zâwk a, thil lawmawm tak a ni. Ram changkâng apiangah rualbanlote hian ngaihsak an hlawh a. Mipui vantlâng punkhâwmna hmun hrang hrang Biak In-ah te, Hall-ah te leh hmun hrang hrangah an tel ve theihna tûrin wheel chair kal theihin an siam vek ṭhin.

Rualbanlote ngaihsakna kawngah hian sawrkâr leh Kohhran pawhin hma a la chak sâwt hle a, hei hi thil lawmawm tak a ni. USA-a Presbyterian Kohhran chuan General Assembly-a palai tûr a ruatnaah rualbanlote aiawhin rualbanlo zînga mi an ruat tel ṭhin an ti. Rualbanlote kan ngaihsak hian Lal Isua kan ngaihsak tihna a ni.