VÊNGTE HMANGAIH

MATTHAIA 22:37-39
Tin, ani chuan a hnênah, “‘Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,’ tih hi. Chu chu thupêk ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi.

Thinlung zawng zawnga Pathian leh vêngte hmangaih hi thupêk ropui a ni (Lev 19:18). Israelte rilruah an vêngte leh an ṭhenawmte chu an chipui Israelte bâk an ni lo. Jentailte chu hremhmun mei chhawm alh nân tâwka ngai an tam. Zâwlnei Jona pawhin Pathian hmangaihte (Ninevi khaw mite) ngaihdam an nihin a hre thiam lo, a lungawi lo.

Pathian kan hmangaihna lantîr theihna chu ama anpuia a siam midangte hmangaih hi a ni. Thu sâwm pêk pawh a tâwp lam paruk (Ex 20:12-17) chu vêngte chungchâng hlîr a ni. Isuan dân hretu zawhna – ‘Ka vêngte chu tute nge ni?’ tih a chhânna a chiang tak chu tu pawh kan ṭanpui mamawhtu chu kan vêngte an ni.

Thi mai tûra an hruaite chu chhanchhuak thuai ru,
Ngai teh, ‘hei chu ka hre lo,’ i ti mai a nih chuan,
Thinlung bûktu hmaah engkim hi a lang vek a ni;
Mi tin thiltih ang zêla rulh leh ngei tûr a ni.

Vêngte hmangaihin Chanchin Ṭha i hril ang u.