SMURNA KOHHRAN THUCHAH

— Chhantea (Oriela patea)
E. Lungdar

B/r. Thupuan 2:8-11

Smurna khua hi khaw hlun hausa leh mawi tak a ni a, kum BC 1000 hma lam a Greek hovin an din niin an sawi. Asia ram Ephesi hmâr lam Aegean tuipui kam a awm a ni. A hunlai a sumdâwnna leh lawngchawlhna hmunpui, khawchhak leh thlang inkalpawhnain a pal tlang an ni. Smurna khua hi Rom lalber pathian ang a biakna hmunpui a nih avangin kristiante tawrhna a nasa hle niin an sawi a. Bishop Polycarp-a pawh kha he khuaa tihhlum hi a ni.

Smurna kohhran hi tu din nge a nih chiang taka sawi fak theih a awm lo a, mahse, Thupuana kan hmuh angin a hunlai a kohhran nung tak Lal Isuan demna a neih ve loh kohhran an ni thung. A uar deuhte phei chuan “tihduhdah kohhran” ti hialin an sawi ṭhin.

I hrehawm zia te, i pachhiat zia te (nimahsela i hausa si a)… kan sawi tawh angin Smurna khua hi Lal Isuan demna che ka nei a ti ve hauh lo, a fakin a fuih reng zâwk a. A khuaah Rom Lalber pathian, a biak a an biakna hmun a awm miau avangin kohhranho ten tihduhdahna, hrehawmna hrang hrang an tuar niin a ngaih theih. Chu mai nilovin tisa lamah pawh ei bar lam thu-ah an pachhe ve hle tih pawh a hriat (mahse, Isuan hausa a ti miau si). Ni e, retheihna vâng leh nawmsak châk luat avânga Rom ringlote pathian biakpui ve te, nawmchenna lam an intawllênna hmun te lam an hawi duh miah lo kha Zoram ringtute hian kan entawn a va ṭûl êm!

Kan ramah hian zawng tisa lam nawmna duh luatah hian kan sakhuana leh kan rinna hi hmai thinghâwngah lek kan hmang a. Krista retheihpui hi kan ngam tak tak lo va, Smurna khua hi zawng… Krista retheihpuina chu an nun a ni a. Hei vângte hi a ni mahna.. Lal Isuan “I hausa si a,” a tih tlat ni.

I tuar tûrte hi hlau suh; ngai teh, fiaha in awm theihnân Diabola chuan in zînga mi ṭhenkhat tâninah a khung dâwn che u a ni. Tin, ni sâwm hrehawm in tuar ang. Thih thlengin rinawmin lo awm rawh; tichuan, nunna lallukhum ka pe ang che.

Smurna kohhranho chu Lal Isuan a fuih mawlh mawlh, amah avânga hêkna, tihduhdahna tinrêng an tuar pawhin hlau lo tûr leh thih thlenga a tâna tuar a, rinawma lo awm tûrin thu a chah. Thu a chah satliah a ni lo a, thutiam neiin thu a chah a, chu a thutiam chu nunna lallukhum pêk a ni.

Chu chu chang ve tûrin nang leh kei hian kan awmna hmunah kan ni tin nunah te hian… Smurna kohhran ang hian tuar ve lo mah ila Krista tân eizawnna, hnathawhna, ni tin kan nunah hian Nunna lallukhum chang ve tûrin i bei hrâm hrâm ang u.

Lalpa’n a thu malsâwm rawh se.