MI TAIMATE HMABÂK

THUFINGTE 12:24
Mi taima kut chuan rorêlna a keng ang a, Mi thatchhia erawh chu hna rim tak thawk tûra tih a ni ang.

Thufingte-ah hian mi taimate hmabâk ênzia leh mi thatchhiate hmabâk thimzia kan hmu nual a. Mi taimâte hmabâk a sawi dân hetiang hi a ni –

1. Mi taima kut chuan hausakna a thlen (10:4b).

2. Mi taima kut chuan rorêlna a keng (12:24).

3. Mi taima rilru chu tihtlai a ni ang (13:4b).

4. Mi taima ngaihtuahna chuan neihnunna lam chauh a pan (21:5).

5. Mi a hnathawha taima chu i hmu ṭhin ngai em? Lal hmâahte a awm ang a, mi narân hmâah chuan a awm lo vang (22:29).

Hêng a chunga mite hi mi taima hmâa inchhawp a ni a. Lehkha zir taimate leh mahni hnâa taima taka thawktuten an la chang dâwn a ni. Hêngte hre reng hian i ni tin hun hmang ṭhin ang che.