ZÛK LEH HMUAM HLAUHAWMNA

THUFINGTE 1:10-12
Ka fapa, mi sualin an thlêm che chuan zâwm suh. “Hawh teh, thisen chhuah tûrin i châng ang khai, A vâng eng mah awm lovin pawi khawih lote chu i châng ru teh ang; Seol angin a nung chungin i lem teh ang, An puma khuarkhuruma tla angin.

Zûk leh hmuam hi ṭhian ṭha tak ang a lang, a kâwm ngeihtute nun lâksak tuma châng ru reng ang a ni. Kum tinin khawvêl puma zu avâng te, drugs vâng te, HIV/AIDS vâng te, Motor accident avâng te leh tualthahna avânga thite âi hian zûk leh hmuam avânga thî an tam zâwk daih a, second ruk leh a chanve dan zêlah mi pakhatin a thihpui zêl ang a ngaih a ni.

Mi thiamten an sawi dânin mi mei zûk khû a bula lo awm ten an hîp luh leh thil dang aṭangin cancer an kâi thei tih a ni a, a hlauhawm hle mai. A hmuam ṭhîn hote aiin a zûte an fîmkhur thiam a ngai tihna a ni. Zûk leh hmuam hian cancer, thawhah, thlûaka thisen zâm chat, pangkhing zeng, zunthlum, thisen sâng, lung natna leh a dang dang a thlen thei. Tiranga leh a anpuite hi kan naupangte leh kan ṭhalaite suattu a ni ṭan mêk. I vênpui bawk ang u.