ṬHIAN SUAL LAKA FIMKHUR

1 KORINTH 15:33
Bumin awm suh u; “Ṭhian sualte chuan nungchang ṭha an tikhawlo ṭhîn.”

Zirtîr ngai lo khawpa sual lama harh kan nih rual hian, kan tih sual tam tak hi kan ṭhiante hnên aṭanga kan lâk chhâwn a ni châwk. Chuvangin Tirhkoh Paula pawh hian ṭhian sualten nungchang ṭha an tih khawloh ṭhin thu min hrilh a ni. “Hmeichhe pahnih inṭhian ṭha tak kârah hian inphiarrûkna a thleng châwk,” tiin Alphonse Karr chuan a lo sawi a, a dik thui viauin a lang.

Ṭhian sualte chuan rinawmna leh dikna an tlachham ṭhin a. Mi bum an chîn avangin kum khaw chawr loh phah hialna tûr kawngah min hruai fo ṭhin. Ṭhian sual kan kawm chuan hnung lama mit nei ang râna awm tûr a ni. Mi ang mi ang lova min siam theitu an ni a, mi ṭha mi suala min chhuah theitu an ni tih hriat reng tûr a ni. Kohhranin camping a buatsaih nikhuaa ṭha taka chhuak ṭhinhote pawh hi ṭhian kawmah fimkhur hle tûr a ni. Thufingin, “Thinrim hmang mi chu ṭhian suh la, mi thinchhia chu kawp suh, a tih dân i zir ang a, i nunna atân thang i tawng dah ang e,” (22:24,25) a ti a ni.