KRISTA TÂNA NUN

2 KORINTH 5:14-15
Krista hmangaihna chuan min tîr lui a ni; heti hian kan ngaihtuah: mi zawng zawng thih aiin mi pakhat a thi a; chuvângin, mi zawng zawng chu an thi a ni; tin, a nungte chu anmahni tân an nun tawh lohva, an thih aia thia tholeha tân chuan an nun tawh zâwkna tûrin a ni mi zawng zawng thih aiin a thih ni.

Lal Isua ringtute chu mahni duhzâwng leh mahni tâna nung reng thei kan ni tawh lo va. Kan thih aia thia tholeha tâna nung tawh zâwk tûra beisei kan ni.

Daniela leh Josefa kha Pathian nung ring lo zînga an khawsak chhûng zawng pawh khân Pathian duhzâwnga an nun avângin an chanchin kan la sawi ning thei lo a nih hi! Ei leh bâr kan zawnna leh politics field-ah te pawh Lalpa duh dânin nung ila. Dikna te, rinawmna te leh thianghlimna silhfente inbelin, kan nun hian Chanchin Ṭha i hril ang u. Tichuan, kan hmêlah miten Lal Isua an hmu tawh dâwn a ni.