KAWNG CHHÛT NGUN

HAGAIA 1:5-7
Tûnah zawng sipaihote Lalpa chuan heti hian a ti: “In kawngte chu chhût ngun rawh u. Tam tak in chîng a, tlêm tê in seng si; in ei a, in tlai si lo; in in a, in kham si lo; in sin a, in lum chuang si lo; inhlawhfa chuan ip pawpa thlâk atân mai a hlawh a ni.” Sipaihote Lalpa chuan heti hian a ti: “In kawngte chu chhût ngun rawh u.”

Juda-ho Babulon sala an tâng Jerusalem-a an kîr leh kum 16-naah pawh Temple sa puitlin lovin an awm a. Mahni nawmsakna thilah an inhaivûr nasat avângin Pathian a lâwm lo va, Hagaia hmangin an kawngte chhût ngun tûra hriattîr an ni ta a ni.

Keini pawh hian inenna tûr kan nei ve ngei ang. Sual bawih ata min hruai chhuaktu duhzâwng leh rawngbâwlna lam ngai pawimawh si lovin, mahni nawmsakna ringawt ngaihtuahin ni tin kan hun kan hmang ṭhin em? Kawppui tûr kan inzawn dânte hi a dik em? Kan chhûngkuain kan kawng zawh mêk hi nunna kawng a ni em? Kan eizawn dânte hi a thianghlim em? Sipaihote Lalpa chuan, “In kawngte chu chhût ngun rawh u,” min ti a ni. Kan kawng kan chhût ngun theih nân Lalpa’n a thu malsâwm rawh se.