THLAMUANNA KA PE A CHE U

JOHANA 14:27-28
Thlamuanna ka hnutchhiah a che u; keima thlamuanna ka pe a che u; khawvêlin a pêk angin ka pêk loh che u hi. In thinlung mangang suh se, hlauh pawh hlau suh se.

Khawvêl mite thlamuanna chu thil neih leh thil thlengah a innghah avângin rei a daih lo. Isua thlamuanna hnutchhiah chu khawvêl mite neih ang ni lo, thlarauva chhûngril thlamuanna a ni. Thil thleng thil neihin a tihnghîn rual loh thlamuanna ṭha mi a ni.

Zirtîrte chuan anmahni lam ringawt an in en avângin, ‘a theih’ tih aiin ‘a theih loh’ tih lam an hmu lian ṭhin. Thlamuanna (Shalom) hi ‘buaina awm lohna’ mai ni lovin kan ṭhatna tûr tinrêng a khung tel a ni. Isua thlamuanna pêkah hnehna a tel. Chu thlamuanna chu i nei tawh em?

Thlamuanna lâwmawm chu,
Ka thinlungah a ṭhang;
Tûnah chatuan hmun nuam lam chu,
Tûn hma aiin ka hnaih.

Isua pêk thlamuanna a hnênah dîl rawh.