MITE MIN HMUH DÂN

MATTHAIA 16:13-14
Tin, Isua chu Kaisara Philippi bial a lo thlen chuan, a zirtîrte hnênah, “Miten Mihring Fapa hi tu nge a ni an tih?” tiin a zâwt a. Tin, anni chuan, “Ṭhenkhatin, ‘Baptistu Johana a ni,’ an ti a; ṭhenkhatin, ‘Elija a ni,’ an ti; ṭhenkhatin ‘Jeremia emaw, zâwlnei tua emaw a ni,’ an ti,” an ti a.

Lal Isuan khawvêla eng emaw chen rawng a bâwl hnuah, miten amah an hmuh dân leh an ngaih dân hriat a duh avângin a zirtîrte a zâwt a. Bible-a mi ropui tak tak – Baptistu Johana, Elija leh Jeremia nia miten an rin thu an hrilh a. A zirtîrtena an hmuh dân ngei pawh a zâwt a, Petera’n, “Krista, Pathian nung Fapa chu i ni,” tiin lungawithlâk takin a chhâng nghe nghe a ni.

Kan kawm duhzawng aṭang te, kan inchei dân aṭang te, kan sum hman dân aṭang te, hun âwl kan hman dân aṭang te, kan sawi duhzawng aṭang te, kan ei leh in duhzawng aṭang te leh kan ngaihsân zâwng aṭang te hian miten tu nge kan nih tih hi an lo hre thuai ṭhin. Miten eng angin nge min hmuh ve hlawm ang le?