JAKOBA CHHÛNGKUA

GENESIS 37:4
Tin, an pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawngkam ṭha rêng rêng a chungah an rawlh thei ta lo va.

Jakoba hian a nu leh pa zia la chhâwngin a fate zîngah Josefa chu a hmangaih bîk a. Kawrfual ze hrang hrang a siamsak a. Hei hi fatîr emaw fatîr anga an pawm duh zâwkte tân an buatsaih ṭhin a ni. A uten an îtsîkin an hua a, ṭawngkam ṭha pawh an rawlh lo a, thah duh khawp hialin an haw ta mai a. Sal man zât tangka sawmhnihin an hralh, a dam rei pawh an ring lo.

Jakoba fate hi nu thuhmun fa ni se chu heti em hian an buai lo mai thei. Amaherawhchu, a tâwpah mawi takin Josefa’n ngaihdamna nên a ute a tuam hlâwm hi a ropui hlê. Chhûngkuaa mi pakhat Pathian ṭih mi avângin chhûngkaw inhriatthiam-lohna pawh hi mâwi takin a pâr chhuak ṭhîn!

Lalpa, i thu ang ni zêl rawh se,
Bêlvawtu i ni, kei bêllei chu;
I duh ang ngeiin min rawn siam la,
I thua awman ka inpe e.

Chhûngkaw khaidingtu nge i nih buaina thlentu?