PUMKHAT AN NIHNA TÛRIN

JOHANA 17:20-21
Hênghote tân chauh hian ngensak ka ni lo, an thu avânga kei mi la ring tûrte tân pawh ngensak ka ni bawk e; an zaa pumkhat an nihna tûrin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna tûrin; nangin kei mi tîr tih khawvêlin an awih theihna tûrin.

Puithiam Lal ṭawngṭaina thupui ber chu inpumkhatna thu a ni (Jn. 10:30). Khawvêlah rah kan chhuah tûr pawimawh ber chu inpumkhatna leh inhmangaihna hi a ni.

Kan inpumkhat thei lo hian Kohhran hmai a tibâl. Ringlote tân Pathian rin a ti harsa (Jn. 13:35). Thurin leh tih dân phungin kan inpumkhatna tibuai lo se. Lalpa pakhat, rinna hmun khat, Thlarau pakhat ringtu kan nihna hian min phuar khâwm mawlh rawh se. Puithiam Lal ṭawngṭaina tihlawhtlingtu nih ṭheuh i tum ang u.

Hmangaihna hrui vuanin,
Thinlung hmunkhat puin;
Kristian kan lo insuih khâwm hi,
Vân lam tih dân a ni.

Inpumkhatna atân hma latu i ni em?