MI ZUI RAWH

JOHANA 21:21-22
Tin, Peteran ani chu a hmu a, Isua hnênah, “Lalpa, he mi hian eng nge a tih ang?” a ti a. Isuan a hnênah, “Ka lo kal leh thlenga awm rengah phei duh ila, chu chu enga i hman tûr nge ni? Nangin mi zui mai rawh,” a ti a.

Petera hi Isua chu, “Krista, Pathian nung Fapa chu i ni (Mt. 16:16),” titu ngat kha a ni. A hnu lawkah ‘Setan, ka hnungah kal rawh,’ tih a ngai leh si (Mt. 16:23). Peteran Isua chu Hmangaih Johanan a rawn zui a hmu a, a thîk deuh nge ni, “Lalpa, he mi hian eng nge a tih ang?” a’n ti leh ṭhuai mai a.

Petera anga mi dang chanvo leh nihna ngaihtuah rân kan lo ni a nih chuan Isuan, “Nanga lo buaipui leh ngaihven chiam a ṭul lo, keiman ka duh angin ka ti mai ang,” a ti a ni. Isua zui chu a kalnaa kal ve a ni. Isua zuitu dik tak kan nih chuan Isua kalna kraws kawng kan zawh ang. Isuan kan hnênah, “Mi zui rawh,” a la ti. Zui mai rawh.

Zui rawh, zui rawh, kei pawh ka zui ve ang,
Khawiah pawh ram tinah ka zui zêl ang a.

Mi nuna inrawlh i chîn ṭhin kha i bânsan thei em!