MO CHUNGCHÂNG

RUTHI 1:8
Tin, Naomi chuan a mote pahnih hnênah chuan, “In nu in lam ve vea haw leh tûrin kal rawh u khai; mitthi chung leh ka chunga in tih ang hian Lalpa chuan in chungah ngilnei takin ti ve rawh se.

Hmânlai Mizo chhûngkuaah chuan mote hi ei leh inah an inkiltawih ngawih ngawih a. Hnathawh lamah erawh chuan an rim hle thung. Mo dinhmun kha dinhmun awhawm loh leh pawnlâng tak angin a ngaih theih. Tunah chuan mo thar tûkah pawh rei tak mu a, ei ṭeuh ngam thote pawh kan awm ta niin a lang (a lawmawm zêlah ngai ila).

Mote en hrang deuh leh a thim zâwnga thlîr tlat mi an awm châwk. Mo lo ni ve tawh bawk nute hi mote tâna dehkhirh an ni duh hle. Mo pawhin mo a nihna a hre rengin, a intichhel tûr a ni a, inhlawhfa rilru pua chêt loh tûr a ni. Pasal chhûngte huikhâwm zâwnga mo nih dân thiam hriat tûr an tam ta hi thil lawmawm tak a ni. Naomi leh Ruthi chanchin aṭang hian i zir thar zêl ang u.