TARTE KHAWVÊL

2 KORINTH 4:16
Chumi avângin kan dawl lo va; kan pâwn lam mihring hi lo awngrawp telh telh mah sela, kan chhûng lam mihring chu ni tin siam thar zêlin a awm zâwk a ni.

Tar hi mihringte hun tâwp lam awm dân tûra Pathian ruat a ni a. Tar vun chu a lo chuarin, an ngaihtuahna pawh a chak lo va. An khawhar a, an vanglai hun an ngai hle ṭhin. An naupang ṭha leh a, mahni an indah pawimawh a, fakte an lâwm hle ṭhin. An inthlahrung ṭhin a, an phunchiar duh hle bawk.

An mize mila kawm a, fak tam tur a ni. Ngaihsak an ṭul hlê a, hmangaihna leh dawhtheihna nên enkawl an ṭul ṭhin. An vanglai sawipuite an lâwm a, “I vanglaiin i hmelṭha âwm,” han tih te leh sa ṭha deuhte chu, “I vanglaiin i chak âwm,” han tihte hi an lawmzawng tak a ni.

Tar thlenga an dam avânga an nihlawh thu te hrilh a, Lal Isua tâwk tûra an inpeih leh peih loh te zawh a, an inpeih loh chuan hma lâkpui tûr a ni. Ngaihṭha taka mual an liam theih nân duat taka enkawl tûr a ni. An phu hrim hrim bawk.