EPHESI KOHHRAN

THU PUAN 2:4-5
Nimahsela, demna che ka nei a ni, i hmangaihna hmasa ber kha i bân tâk avângin. Chutichuan, i tlûksan tâk chu hre reng la, simin, a tîra i thiltihte kha ti leh rawh; chuti lo chuan, i hnênah ka lo kal ang a, i sim loh zawngin i khâwnvâr dahna kha a hmun ata ka sawn ang.

Thupuan ziak hun lai vêl (AD 90-96) hian Ephesi hi Asia ram khaw lian ber leh pawimawh ber, lawng chawlhna hmun lian ber leh sumdawnna hmunpui a ni a. Pathiannu Diani biakna hmunpui leh a lim chherna hmunpui a ni bawk. Hetiang khawpuiah hian kohhran a lo ding a. Tirhkoh Paula khân a zin vawi thumnaah kohhran tinghet tûrin kum hnih a châm chilh a. Ringtu nasa takin an pung a, dawithiamna lam lehkhabu pawh Rs. 50,000 man lai an hâl nghe nghe a ni.

Khawpui lian taka kohhran ding a nih vâng nge, hun lo kal zêlah Lal Isua an hmangaihna an bânsan chho ta a. Thil danga an ṭhahnemngaihna chuan hmangaihna hmasa an bânsan chu a bûk kâng zo lo va. An sualte sim a, Lal Isua hmangaih thar leh tûrin Johana hmangin Lal Isuan a hriattîr a ni. Lal Isua hi kan la hmangaih ber nge thil dang kan hmangaih tawh zâwk?