PATHIAN HNÊNAH FINNA DÎL

JAKOBA 1:5-6
In zîngah tu pawhin finna a tlâkchham chuan, mi zawng zawng hnêna hau lo leh ui lova pe ṭhîntu Pathian chu dîl rawh se; chutichuan, a hnênah pêk a ni ang. Nimahsela, ringhlel hauh lovin, rinna neiin dîl rawh se; ringhleltu chu tuifinriat fâwn, thli chhêm lên leh vawrh ang a ni si a.

Finna chu khawvêl thil hriatna ni mai lovin Pathian ropuina hmaa awm dân thiamna a tel a ni. Finna-ah chuan hriatna aia pawimawh, hriatna hman thiamna a tel a ni. Finna chuan kan tlin tâwk lohzia min hriattîr a ni. Lalpa ṭih chu sual huat a ni (Joba 28:28).

Finna dîltu chuan rinna tak tak nên, ringhlel lovin a dîl tûr a ni. Ringhlel chunga dîl ai chuan dîl loh law law mai tûr a ni. Pathian ring ve deuh, innghat ngam leh tak tak si lo chuan dîl loh mai tûr. Dîl chu hmu tawh a inngai, thil beiseite awm ngei a hriatna a ni. Ring chunga a hnêna lokal chu a chhâng ngei ṭhin.

Ka ṭawngṭai ngaithla la,
Ka dîl malsâwm ang che;
I aw nêm nghakin ka lo ṭhu,
I thlamuanna, i thlamuanna aw chu.