EDEN HUAN VRS GETHSEMANE HUAN

— Chhantea (Oriela patea)
E. Lundar

Eden huan ah chuan mihringin Pathian a tlûksan.

Gethsemane huan ah chuan phatsantu mihringte tân Tlantu in inpêkna bul a ṭan.

Eden huan ah chuan mihringte kan sual avângin kan lungngai a.

Gethsemane huan ah chuan kan sual avângin tlantu a lungngai.

Eden huan ah chuan thuawihlohna avângin mahni duhthu ngeiin bawhchhiatna a inṭan a.

Gethsemane huan ah chuan ama duhthu nilovin pa Pathian thu thu ni zâwk rawh se tihin thuawihna nun nên a awm.

Eden huan ah chuan thuawihlohna vângin mihringin Pathian a bihrûksan a.

Gethsemane huan ah chuan thuawihna vângin mihringin Pathian a zawng.

Eden huan bawhchhiatna chuan Pathian leh mihring in mihran in an inhnungchhawn a.

Gethsemane huan ah chuan hmangaihna vângin hnuchhawn ram a lêng mihring te tân Pathian a inhlân.

Rawngbâwlpui duhtak, i hmangaih ber i nupui, pasal, bialnu, bialpa te khan i tân a tih theihtâwka hlu a pêk che khan i hmêlah hlimna leh lâwmna a lo lang chhuak ṭhin tiraw. A tân thil eng emaw tihsak ve pawh i châkin i duh ang tiraw?

Pathian chuan Eden bawhchhiatna ata a hnên ata bo kan nih hnu ah leh rante leh kêlte thisen hmanga tlanna famkim kan chan theih loh vângte in leh vân angel thisen a tlan ve lohte hmanga tlanna hna thawk lo in a fapa ngei hmangin tlanna hna a rawn thawk a. A neih zînga hlu ber nang leh kei in nun kan neihna atân a rawn pe asin. Chu chu lâwmin atân i inpe ve dâwn em le?

Aw, van angel thianghlim sak ve theih loh hla mawi;
Khawngaihna mak hla mawi ber chu
Kei mi sual ber chhandamna hla.

MARKA 14:36 – “Abba, ka pa, engkim i ti thei a, he no hi mi lâk sawnsak rawh; nimahsela, keima thu ni lovin nangma thu thu ni zâwk rawh se,” a ti a.

Pathianin a thu malsawm rawh se.