KAN AWM DÂN

— Chhantea (Oriela patea)
E. Lungdar

Mi tin hian awm dân khawsak phung hi mimal nunah, chhûngkuaah, vantlâng nunah, kohhran leh khawtlâng pawl hrang hrangah kan nei vek ṭhin.

Mihring chu tu pawh Eden bawhchhiatna ata famkim tawh lo, ṭhatna lai leh chhiatna lai nei vek kan ni a. Kan awm dân te hi insiamṭhat fo kan ngai ṭhin a ni.

Tunlâi ṭhalaite khawvêl chu ‘It’s my life – hei hi ka nun a ni, tuma sawi theih a ni lo’ tiin kan nun atân mahni kan inhumhim a. Kan duh dân dânin kan nung a, kan duh duh kan sawi a. Kan châk zâwng apiang kan ti a. Nu leh pa ten min sêlin min zilh dâwn se… hei hi ka nun a ni kan ti tlat si. Kan zonun ze mâwi leh kristian nun dân kan bosan tial tial niin a lang.

Hei hi ka nun a ni ti ṭhîn mah ila siamtu nei, neitu nei kan ni. Kan thi fo ṭhin a, mihring tâwp chin nei kan nih avang hian hawh u… he khawvêla kan châm chhûng tawiteah hian midangte nên inrem tûrin kan awm dân siam rem ngai te i siam rem ngam ang u.

Mi Pathian hmaa a tlâwm chen apianga mihringpuite hmaah pawh tlâwm thei. Keimah vânga midangte insiamrem tûra ti lovin keimah zâwk hi midangte tân i insiamrem zâwk ang u. Chu chu Pathian thu a ni.

THUFINGTE 21:2
Mi tin awm dân hi mahni mitah chuan a dik tih a ni a; Nimahsela, Lalpan thinlung a bûk ṭhîn.