KA AWM ANGIN

JOHANA 6:37
Pain mi pêk apiang ka hnênah an lo kal ang a, ka hnêna lo kal tawh phawt chu ka hnawt chhuak lo vang.

‘Just as i am’ – Charlotte Elliot (1789-1871)
‘Ka awm angin’ – K.H.B. 368

Charlotte Elliot-i chu a tleirâwl chhuah laiin malsawmna tinrêng a dawng emaw tih mai tûrin hamṭhatna tinrêngin a nun a bual a. Lem a ziak thiam a, hla a phuah thiam bawk a. Mahse kum 30 a rawn kai chhoh meuh chuan natna khirhkhan tak maiin a tlâkbuak ta tlat mai a. Chu chuan nasa takin a taksa a tih chakloh mai bâkah a rilru thlengin hnualna nasa tak a thlen hial a ni.

A dam lohna avângin Switzerland Doctor, Dr. Caeser Malan chuan a tlawh a, Dr. Caesar-a chuan, “Pathian hnênah thlamuanna i nei em?” tiin a zâwt a. Mahse Charlotte-i chuan a zawhna chu hnâwlin chu lam engmah a sawi peih loh thu chauhin a chhâng a.

Mahse ni rei lote hnu chuan Charlotte-i chuan Dr. Caesar-a hnênah chuan ngaihdam a dîl a. “Dik taka sawi chuan, Kristian ka nih hma hian ka nuna thil tam tak hi tihfai ka duh hmasa a ni” tiin Dr. Caesar-a chu a chhâng ta a. Dr. Caesar-a chuan mitmeng dam taka en chungin, “I awm angin lo kal rawh,” tiin a chhâng a. Chu chhânna chu Charlotte-i tân a tâwk hlê mai. Chumi ni aṭang chuan Pathian a pan ta a ni.

Kum 14 a liam hnu chuan Brighton, England-a Dr. Caesar Malan-a chhânna chu a ngaihtuah lêt a, he hla mawi tak leh ṭha tak hi a lo phuah ta a ni.

Keini pawh kan awm ang angin Pathianin min ko a ni tih hre thar ila, paihthlâk theih loh nun chu a hnên kan thlen hunah kan paihthla thei zâwk dâwn a ni. Petra vocalist John Schlitt-a chuan a hla pakhatah, “I awm ang ang khan hmangaihtu che an awm” (There is someone who loves you just the way you are) tiin mawi takin a lo sa tawh bawk.

Ka awm angin ka lo kal ang,
I thisen hlu ka tân a luang;
Tin, Nangin min sâwm avângin,
Ka Tlantu, ka lo kal.