MI DANG SAWISEL SUH

MATHAIA 7:1-2
“Sawisêl suh u, sawisêla in awm loh nân. In sawisêlna ang bawkin sawisêl in ni ang a, in tehna ngeiin an tehsak ang che u.

Ram inkaihhruaina lama hmalâkna kawngah te, khawtlâng hruaituten thil an kalpui dânah te, Kohhran thilah te leh kan inṭhenawmna thil thleng pawhin mi dang sawisêl mai a awl hle. Hetiang a nih avang hian Lal Isua pawhin kan hriatreng tûrin a lo sawi niin a rinawm. Mihring hmêlma chu mahni kan ni a. Kan tuh rah a chhia a ṭha kan seng zêl bawk. Mi dang sawisêl ṭhin ka nih chuan miin min rawn sawisêl ve dawn a ni.

Mi dang sawisêl tûr chuan mahni lamah dik hmasak a ngai ṭhin a. Mahni engmah ni si lova mi dang dik lohna va hmuh theih viau hi Lal Isua duhdân a ni lo. Kan ram politician-te pawh hi party dang sawisêlna kawngah hian kan tilutuk deuh ṭhin em aw? Media lamah kan chak tawh avang hian kan sawi leh tih engkim mai hi kan hmet chhuak zung zung mai si a. Fimkhur taka mahni lei kan vên ṭhat pawh a ṭul lehzual ta.