KRAWS MIN HNAIHTIR RAWH

HRIATCHIANNA HLU BER 1

EPHESI 2:13
Tûnah erawh chuan Krista Isuaah, nangni hmâna hla taka awmte kha, Krista thisen chuan tihhnaih in ni ta.

Fanny Crosby leh William H. Doane te inkawp chuan hla mawi tak an phuah a. A tîr chuan Doane-a chuan a rimawi chu a han tum rât rât a, chutia ri mawi êm êm mai Fanny Crosby-in a lo hriat chuan Pathian pâwlna changin a mit khua fiah loh mah se thlarau mitin chu Kraws-a damna tui chu chiang takin a hmu a, chu hmuna awm chu a duh a, chutah chauh chuan a damna kim a awm a ni tih hriain rimawi hmanga Pathian pâwlna kârah “Isu, kraws mi hnaihtîr rawh, Tuikhur hlu awmna kha; Damna tui mi tin chhuahna, Kalvari-a a luang kha” a rawn tichhuak a. He hla mawi tak hi kan lo nei ta a ni.

Fanny Crosby-i hi khawvêla Pathian fakna leh chawimawina hla ziaktu ropuiber a ni kan ti thei ang. A tlukpui tûr leh a chunga leng thei chu Isaac Watts leh John Wesley-a te chauh an ni mai thei bawk. Hla sangthum chuang teh meuh mai a phuah a, a hla phuah tam tak chu khawvêl ram hrang hranga Kristian awmten an sa mêk a ni.

Kum 1820, March ni 24 khan New York-ah a lo piang a. Thla ruk mi lek anih aṭangin a mit a del a. Mahse a hlim thei em em a, kum 8 mi lek a nih khan tihian hla a lo phuah tawh, “Aw hlimna thlarau ka nei, hmu thei lo mah ila; He khawvêl ka tân thim mah se, lungawi tûr ka lo ni” tiin.

Isu, kraws mi hnaihtîr rawh,
Tuikhur hlu awmna kha;
Damna tui mi tin chhuahna,
Kalvari-a luang kha.

Kraws-ah chuan, kraws-ah chuan,
Ka ropui awm rawh se;
Ka thlarau lui piah lama
Lâwm taka chawlh thlengin.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy