A TÛK LUNGKHAM

MATTHAIA 6:27
Tin, nangni zîngah lungkham avângin tuin nge mahni dung lam tawng khata tisâng chuang thei?

Nimina i thudik ṭan vâng emaw i thil tih dik avangin a tûkah hlauhthâwnna i nei tawh em? Nimina i thil tih dik loh vâng emaw i rinawm loh avangin a tûkah lungngaihna i nei tawh em?

Nu pakhat hian chawlhkar khatah ni khat tal hi lungngaihna ni atân a hmang ṭhin a. Hun harsa leh hrehawm a tawnni apiang chu chhinchhiahin a notebook-ah chuan a ziak ṭhin a. Entirnan: ‘Lungngaihni, Nilai’. Mak tak maiin chung a lungngaihna zawng zawng te chu chinfelin a awm fo ṭhin a ni.

American poet lâr tak, Ellen M.H. Gates chuan rilru-a lungngai ṭhinte tâna Pathiana thlamuanna a awmzia a poem ‘Muangin mu ang che’ tihah chuan hetiang hian a ziak; ‘I pindan reh tak hnuaiah chuan muangin zân mu chhîng ang che; Lalpa Pathian chuan a vêng ang che; hun kal tawh manganna zawngte kha a kiang tawh ang; I thlamuanna tibuaitu te kha; Lalpan a lâk kiansak ang che; A ârsi êngmawi tak chu i chungah êngin a veng ang che a; Muangin mu ang che, mangṭha le.’ tiin.

Pathian fate kan ni a, Pain a fate a kalsan ngai lo angin Pathianin min kalsan dâwn lo tih i hria ang u. Lungkham mangan buainaten kan nun min chîmbuai ṭhin a, ni tin nî leh thla a êng reng thei lo a, lungngaihna chhûmpui nasa takin min hual châng a awm ṭhin. Khawvêl kan lungkham avângin kan buainate chinfelin a awm lo va, Pathian chuan engmah lungkham lo tûrin min ti a ni.

MATTHAIA 6:11
Vawiinah hian kan ei khawpin chaw min pe ang che.