FATE TÂNA KHÂWLKHÂWM

FATE TÂNA KHÂWLKHÂWM 1

1 TIMOTHEA 6:19
Nunna, nunna tak tak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh.

Kum 1950 khân khawizu chi thar an siamchhuak a, chu khawizu chu savawm note ang pian bâwmah an dah a. A hmêlhmang chu naupang lâwm atân pawha duhawm tak a ni.

Pitar pakhat hian a lei ve a, chu khawizu bâwm chu a tiruak thuai a, an choka-a gas hûnna chungah chuan a dah a, naupang ban phâk loha awm a ni a, a tute chuan hmuhnawm an ti thei hle a, khawih an châk ṭhîn hle a ni.

Pitar chuan chu khawizu bâwmah chuan pawisa thir nawi hi a khâwl ṭhîn a, a remchân apiangin a dah a, a lo khat a, a tiruaka a dah leh ṭhîn a. A tute chuan mak an ti thei êm êm a. Chutiang chuan kum tam tak a ti ṭhîn a ni.

A tunu upa ber chuan college a rawn kal ve theih tâkah chuan lehkhabu leina tûr te a mamawh a, mahse an mamawh ang zât pawisa an nei thei ta si lo a. Tûk khat chu khawizu bâwmah chuan lehkha zial a awm ta tlat mai a. A chhûngah chuan cheque a lo awm a.

Hun rei tak ata a piin pawisa thîr nawi tê tê a lo khâwl chu a lo pung a, pawisa tam tak, lehkhabu leina tûr bâkah thil tam tak leina daih a lo ni ta a. Chu pawisa chuan a tunuin college a zir chhûng a daih ta hial bawk a ni.

A tunu chuan pawisa thîr a hmuh apiangin a piin a chunga a thiltih a hrechhuak a, Pathian hnênah lâwmthu a sawi ṭhîn a ni.

Pawisa thîr hi hlu tak a ni hran lo a, mahse tam tak an lo nih khan mamawh lei nân te, chhûngkaw ei tûr lei nân te hman khawp a lo daih a. College kal thei lo tûr pawhin a kal theih phah ta a ni.

Thil tê tak pawh hian thil ropui tak a tih theihzia kan zirchhuak a ni.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy