KAN PA VANA MI

MATTHAIA 6:9
“Chutichuan, nangni chu hetiang hian ṭawngṭai rawh u: ‘Kan Pa, vâna mi …”

Lalpa Ṭawngṭaina ‘Kan Pa’ tia ṭan a ni hian Pathian chu mi zawng zawng tân Pa a nihzia a tilang a. Naupangtein a pa chu mi pa aia huai zâwk, thiltithei zâwk, chak zâwk, thil hre zâwk, etc.-ah a ngai ṭhin a, a bulah a thla a ngam êm êm ṭhin. Chutiang chuan Lalpa ṭawngṭaina kan sawi a ‘Kan Pa’ kan tih hian kan Pathian hi pathian dang zawng zawng aia ropui zâwk, thiltithei zâwk, chak zâwk, huai zâwk leh lalte Lal, hotute Hotu, rorêltute Rorêltu; thlamuanpuiawm tak Pa kan nei a ni tih kan hriat reng a pawimawh.

Chutiang khawpa Pa ropui kan neih Pathian chu vânah a awm a. Kan ṭawngṭainaa ‘vâna mi’ kan tih hian mihring aia chungnung zâwk, ropui zâwk, thil dang zawng zawng laka hrang leh thianghlim a nihzia te a tichiang bawk. ‘Vâna mi’ han tih hian hla tak, koh phâk lohva awm anga ngaih tûr a ni lo. Amah a awmna apiang hi vân a chang zêl bawk ṭhin.