ṬHINGṬHI CHUNGIN

EZEKIELA 22:30
Thinura ram chu ka tihchhiat vek loh nân a bang chim rem ṭha tûr, a chhe laia lo ṭang tûr mi, an zîngah ka zawng a, ka hmu zo hauh lo.

Sandra Goodwin-i poem ziah ‘Ṭhingṭhi-a ka zinna ram’ tihah chuan ṭawngṭainain he khawvêlah thil a tih theihzia min hriattîr a. Pathian chuan a thiltihtheihna te chu a hnêna kan ṭawngṭaina kaltlanga târlan a duh fo reng a. Kan ṭawngṭai loh chuan chu chu kan hmu ngai lo bawk a ni. Hetiang hian a ziak;

“Nizan ka mumangah chuan tuipui zau takah khualzin angin ka kal a; Lawngin emaw Thlawhtheihnain emaw zin kawng chu ka zawh lo va, ṭhingṭhi chungin a ni chu kawng chu ka zawh ni. Chu tuipui zau leh thûk takah chuan sualna avânga boral mêk, tuipui thim takin a chîm pil mi tam tak ka hmu.

Lal Isua chuan chu hmunah chuan kal zêl tûrin min ti a, thlarau bo chhanchhuah tûr an tam avangin;

Mahse, ‘Isu, heti ringawt chuan ka kal thei lo ang, hna ka thawk thei hek lo ang,’ tiin. Rang taka ka buaina chhângin, ‘Thei e, ṭhingṭhi chungin chu hmun chu pan zêl rawh,’ min ti a.

‘Ṭhingṭhiin ṭawngṭai zêl rawh, i mamawh ka phuhru zêl ang, ṭhingṭhiin min ko zêl la, ka lo ngaithla zêl bawk ang che, thlarau bo, a hlâ a mi te, a hnai a mi te chu chhanchhuak rawh le,’ min ti leh a.

Chutin ka bei zêl a, ṭhingṭhi-a ṭawngṭaiin ka kal beuh beuh a, harsa ka tiin ka beidawng hial a. Mahse, Lalpa, Isua Krista chu ka ding lamah a lo kal ve reng tih ka hmu a. Ka han ṭawngṭai leh chiam a, chutah le! mi tam tak chu sualna ata chhanchhuahna ka hmu a, damlote an lo dam chiam a, Pathian rawngbâwltu, khûp zawi leh bân uaite chu Mupui angin thlain an thlâwk chhuak a, an lo chak thar leh ta a ni.

Kei chuan, ‘Lalpa Isu, hei hi ka hna a ni, ka Lalpa lâwmna tûra thawh hi. Min kohna anga ṭhingṭhiin, ṭawngṭaiin ka kal zêl ang,’ tiin.”

TIRHKOHTE 20:36
Chûng thu a sawi zawh chuan an za-in a ṭhingṭhitpui a, an ṭawngṭai a.