RAM TE, THILTIHTHEIHNA TE, ROPUI TE, CHATUAN I TA A NI SI A, AMEN

1 CHRONICLES 29:11
Aw Lalpa , ropuina te, thiltihtheihna te, chawimawina te, hnehna te, lalna te hi i ta a ni a.

Lalpa Ṭawngṭaina tâwp lam, a chunga kan târlan hi Bible lehlin tam takah a awm lo va. Suria Bible-ah chuan ‘ram te leh ropui te chatuan i ta a ni’ tiin an dah a. Didakhe (Tirhkoh sawmpahnihte thu zirtîr, A.D.70)-ah chuan ‘thiltihtheihna leh ropuina, chatuan i ta a ni’ tia dah a ni. Tuna kan hman mêk, ‘Ram te, thiltihtheihna te, ropui te, chatuan i ta a ni si a’ tih hi a hmang hmasa bertu chu Tatiana nia sawi a ni a, A.D.160 vêla mi a ni a, Lal Davida ṭawngṭaina, a chunga kan tarlan aṭanga phuah nia rin a ni.

Khawvêl lal ram chu tlu chhe thei, tâwp chin nei a ni a. Pathian ram chu, ram hlun, ral ve ngai lo a ni. Khawvêl ram thiltihtheihnate chu phâk chin leh phâk loh chin nei, chhut chhiat vek theih a ni a, Pathian thiltihtheihna chu a zual zêl dâwn. Khawvêl lal leh mi liante ropuina chu a chuai mai ṭhin a; kan Lalpa ropuina chuan chuai ni a nei ve dâwn lo a ni.