MIDANG ṬHATNA ZAWNG

1 KORINTH 10:24
Tu pawhin mahni ṭhatna tûr zawng lovin, mi dang ṭhatna tûr zawng zâwk rawh se.

Lirnghîng avangin loneitu pa pakhat chu tlâng pâwngah a tlân chho a, chulai chu buh hmun zâwl zau tak chuan a hual pût mai a. Chutih lai tak chuan a piah lawka tuipui rawn ri hum hum chu a hria a, sakeibaknei rawn lîm ang maiin vaukam lamah tui chu a rawn inbawh phei tup tup mai chu a hmu bawk a. Tuipui fâwn chuan a buh hmun leh an khaw mite buh hmun chu a rawn chîm vek dâwnin a hmu a ni.

Chutih lai chuan a ṭhenawmten an buh hmunah hna an lo la thawk bawrh bawrh mai bawk si a. Engmah an hre ve lo tih a hria a, a awmna tlângah awm ve tûrin hriattîr a tum ta a.

Engmah ngaihtuah hman lo chuan a buhkuang chheh khâwm chu a hâl ta chiam mai a. Tichuan, an Temple dâr chu a vaw ri ta chiam mai bawk a. A ṭhenawmte chuan a buh hmun a kâng emaw tiin an tlân khâwm a, mahse a lo kâng hauh si lo. An han hawi chhuak ta a le! Tuipui lian chuan an buh hmun chu a rawn chîm ta hum hum mai a, an ui lutuk chu an chiau vawng vawng mai a, mahse an ngaihtuah chian erawh chuan loneitupa chuan an nunna hlu tak a chhanchhuak a ni tih an hre ta a ni.

Chumi ni aṭang chuan an ṭhenawmte ṭhatna avangin ni tinin ṭawngṭai tûrin Temple-ah chuan an kal ta ziah a ni.

Hetiang dinhmunah chiah hian ding ila chhanchhuah hna kan thawk ṭheuh ang. Mahse hetiang dinhmun chiah lo-ah pawh chhanchhuah hna emaw, midangte tâna thil ṭha tihna hna emaw, midangte ṭanpui theihna remchâng tam tak a awm ṭhin.

Kan mihringpuite ṭhatna tûr ngaihtuah ngai loh avangin hun ṭha leh remchâng kan bawhpelh a tam hlê. Chu chu thu hran ni se, remchâng a awm avang chauhin ṭhatna lantîr tûr a ni lo a, khawi hmunah pawh, engtik lai pawhin kan lanchhuah tîr tûr a ni.

ROM 15:2
Intihsâwt tawn nân mahni vêngte tilâwmin an tâna ṭha tih i tum ṭheuh vang u.