KRISTA HRIA

SAM 23:1-2
Lalpa chu mi vêngtu a ni a; Ka tlachham lo vang. Ani chuan hlobet hring dup hmunahte mi bawhtîr ṭhîn a; Chawlhna tui kamahte mi hruai ṭhîn.

Kum tam tak liamtaah khân party-na hmunah film changthiam lâr tak hi a rawn kal ve a. Chutia a hmêl an hmuh tak thut avangin kal khâwmte chuan thil tihsak turin an ngên a. An thil beisei chu recitation sawisak tûrin a ni.

An zînga upa deuh ber chuan Sam 23-na ‘Lalpa chu min vengtu a ni a…’ tih kha sawi tûrin a ti a. Chupa chu a ner nâwng a, tihhlawhtlin loh a hreh ve deuh bawk si a, a han ngawih deuh hnu chuan, “Ka pu, ka han sawi phawt ang a, ka ngên ve a che, ka sawi zawhah i sawi ve ang,” a ti a.

Putar chuan, “Kei chuan ka sawi thei ve meuh tawh hleinem, ka tar tawh a, ka aw a fiah tâwk tawh lo a, in hre thei tawh lo ang,” a ti a.

Chupa chuan a han sawi ta a, a sawi thiam phian a, a fiah fel fai bawk a, a sawi zawh chuan kal khâwmte chuan kut an bêng dar dar a. A sawi zawh tâkah chuan putar chu a rawn dingchhuak ve ta a, a han sawi ve chiah chu aw chau tawh tak a ni tih chu hai rual a ni lo. Mahse, a sawi zo a han ṭhu chiah chu kal khâwmte zîngah mit hul rêng an awm lo!

An ngawih ṭhap lai chuan film changthiampa chu a rawn ding chhuak a, “Ṭhiante u, lo ngaihthla teh u, ka recitation sawi khân in mit leh beng a titlai ngei tih kha ka hmu chiang êm êm a, mahse kan pu hi chuan in thinlung khawih phâkin a sawi a ni. A danglamna chu hei hi a ni, kei chuan Sam 23-na hi ka hria a ni mai a, mahse kan pu-a hi chuan, Lalpa, Berâm vêngtu (Shepherd) hi a hria a ni,” a ti a.

Kan nunin Krista a hriatna hi sawi mai lova kan lantîr hi a va pawimawh tak êm. Chu chuan mi thinlung, mi nun a khawih ṭhîn si a.

1 KORINTH 4:1
Keiniho hi Krista rawngbâwltuah leh Pathian thurûk enkawltuah miin min ngai rawh se.