KA PA A NI

1 JOHANA 2:1
Fate u, thil sual in tih loh nân hêng thu hi in hnênah ka ziak a nih hi. Amaherawhchu, tu pawh lo sual ta sela, Pa hnêna min sawipuitu mi fel, Isua Krista chu kan nei.

Telephone Bill emaw Electric Bill emaw pe tûrin hun rei tak intlar ta ila, kan pêk hmain khâr hman ta si se, a thinrim thlâk viau ang. Hmelhriat neih-a pêk hrâm kan duh ṭheuh âwm e.

US President lo ni tawhte tih dân ang bawkin Abraham Lincoln-a pawhin ni tin amah hmuh tum tute chu a chawpin a lo dawngsawng zêl a. Ni khat chu sipai thuama inthuam hian hmuh a duh ve avângin a rawn lênglût ve a.

President hmuh tumte ṭhutna-ah chuan a ṭhu ve mai a, chanchinbu chhiar tuma a han ban lai tak chuan President fapa Tad-a chu a bulah a rawn kal a, tu nge a nih a hre lo a, mahse naupang mai anih avângin ṭha takin a lo kâwm a. Room pakhatah chuan an inzui lût a, Tad-a chuan chu sipaipa thuam leh kawnghren vêlte a lawm êm êm a, chuvangin a ngainat phah a ni.

Rin aia an inkawm rei tâk avâng chuan sipai chuan Tad-a hnênah chuan, “President hmuh tuma rawn kal ka ni a, ka va phei tawh ang e,” a ti a. Tad-a chuan, “Buai duh suh, ka pa a ni a, ka hmuh tîr dâwn che nia,” a tih zawh chiah chuan President Secretary a rawn kal a, President hmuh hun an khâr tawh thu a rawn puang a.

Hun khat tawh mah se sipai chu a la awm tlat a, Secretary chuan a hmuh theih tawh loh thu a hrilh nawn pawh chuan a haw duh lo a, a chhan chu a fapa, Tad-an a hmuhtîr dâwn vâng a ni.

Kawng inkhâr tawh hnu chu fapa kaltlangin kawng a lo inhawng leh anih chu. Vawiin-ah hian Pathian nung fapa, Isua Krista chuan kan zavai hian kan harsatna ata min ṭanpui a duh a, Pa mithmuh-a kan tlin theihna tûrin kan ai a awh ta a ni.

ROM 5:8
Amaherawhchu, Pathianin min hmangaihzia a lanna chu – mi sual kan nih reng laiin Krista kan tân zu thi a!