NGAIHDAMNA

EFESI 5:2
Kristan min hmangaiha, Pathian lâwmzâwng thilpêk leh thilhlan rimtui ni tûrin kan tân a inpe ang khân hmangaihna nei ve rawh u.

Christian College pakhatah hian zirlai pakhat, tihmawh deuh mai hi a awm ve tlat mai a. A professor leh a zirlaipuite a tibuaiin harsatna a siam fo mai a. An college-ah chuan tumahin an ngeih lo a, thurualpui thei loin an kâwm hlei thei lo a. College inkaihhruaina hrang hrang leh discipline-te chu a lakah chuan a hlawhchham deuh vek a ni.

Chutiang chu anih avangin an College Director beng a thleng ta hial a. Director chuan a ko ta a. A awm dân zâwng zâwng chu an Professor hnên aṭang leh zirlaite aṭanga a hriat tawh avângin a na thei ang bera hrem a tum a.

Director chuan a awm ṭhat duh loh vang te, thu a awih duh loh vang leh tih tûr an tih a zawm duh loh avanga koh hial a ngaih thu a hrilh a. Pawisa tam tak a chawi tûr thu leh a pêk theih loh chuan College aṭanga hnawhchhuah anih tûr thu a hrilh nghal bawk a.

Lehkha-in a pawisa chawi tûr zât an han hrilh chuan a tam a ti êm êm a. Pêk tur a nei dâwn lo tih a hria a, Director hnênah chuan, “Sir, heti zât pawisa ka chhûngte pawhin an nei lo a, engtin nge ka tih ang?” a ti a. Lungngai êm êm in a haw a.

A professor, vawi tam tak a ṭhatna tûr atâna ṭawngṭai ṭhin chuan Director thupêk chu a lo hria a, zirlai chu a khawngaih a, a ko ta a, a chhûngten an pêksak thei lo tih a hriat phei chuan a khawngaih zual a, pêk sak a tiam ta a. Chu zirlai chuan mak ti êm êm in, “Sir, i thu ka awih lo tih ka hria a, hei hi min pêksak duh ang maw?” a ti a.

A thinlung sak tak chu hmangaihnain a tihkeh sak a, zirlai chuan mittui tla chungin ngaihdam a dîl mai lo a, a nun dân zawng zawng thlâka fel tak leh ṭha taka awm tûrin a intiam ta hial a ni.

MATHAIA 5:44
Kei erawh chuan ka hrilh a che u: i hmêlmate chu hmangaih la, a tiduhdahtu che chu ṭawngṭaisak rawh.