KHAWVÊL NGHÂWNGKAWL NGE LAL ISUA NGHÂWNGKAWL?

Auto Draft 12

— Joseph B. Zomuanpuia
Rahsiveng, Lunglei

MATTHAIA 11:28-30
“Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” a ti a.

Kan tûnlai nun han en hian mitinte hi kan thawk rimin, sum leh pai leh in leh loah pawh hma kan sâwn nasa hle. Amaherawhchu, a tam zâwk hi chu hêng kan thil neihte hian min va tihlim lo si êm! Eng nge a chhan ni ang le?

A chhan leh avâng chu Lal Isua nghâwngkawl ni lovin khawvêl nghâwngkawl kan la bah vâng a ni. Nghâwngkawl hi hnathawh nâna siam a ni a, leileh nâna hman țhin a ni. Nghâwngkawl pakhat hi bâwngpa pahnihin leileh nâna an hmang țhin a ni. Chutiang chiah chuan Lal Isua’n, “Ka nghâwngkawl bât ula,” a tih hian Amah thawhpui tûra min sâwmna a ni.

Kan Bible ngêi pawn, “Tu pawhin hna a thawh duh lo chuan ei pawh ei suh se,” tiin min zirtîr a; amaherawhchu, kan hnathawhna nghâwngkawl hi, “Lal Isua nghâwngkawl nge khawvêl nghâwngkawl?” tiin mahni i han inzâwt chhin teh ang u.

Khawvêl nghâwngkawl bâtte chu eng ang pawn hausain, sum nei mahsela harsatna leh hrehawmna an chunga a thlenin an chhe mai țhin; nimahsela, Lal Isua nghâwngkawl bâtte erawh chu eng ang harsatna leh hrehawmna tâwk mahse chhel takin an tuar hram hram a, tlachham țhîn mahsela lungawi zêl an chîng tlât a, tlâwm taka awm dân an thiam a, hausaa awm dân pawh an thiam a; thil tinrêngah leh thil zawng zawngah tlai leh rilțâma awm dân, hausa leh tlachhama awm dân thurûk an hre tlât țhîn. A chhan chu eng dang vâng mah ni lovin an mahni tichaktu, Lal Isua avângin eng pawh tâwk tûrin chakna an neih tlât vâng a ni.

Mi pakhat sawi dân takin, “Sumin khum kan lei thei mahse muttuina erawh kan lei thei lo. Sumin in leh lo țha tak kan lei thei mahse chhungkaw hlimna erawh kan lei thei lo,” a tih ang takin sum leh paiina a tih theih hi chu a tlêm a ni. Chuvâng chuan mitinte hian sum leh pai thawh chhuah nâna kan nghâwngkawl bah hi khawvêl nghâwngkawl nge Lal Isua nghâwngkawl tih kan chian hmasak fo a pawimawh. Lal Isua ngêi pawn, “A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia,” tiin a sawi hial kha mawle.

Eng ang pawn lo hausa mah ila Lal Isua nghâwngkawl ni lo khawvêl nghâwngkawl hmanga hausa kan nih chuan lungngaihnain min tlâkbuak tho tho țhîn. Thufingah pawh, “LALPA malsâwmna chuan a tihausa țhîn a, lungngaihna a belhchhan țhîn lo,” tiin kan hmuh hial kha.

Lal Isua nghâwngkawl hi kan bât lo anih chuan he khawvêl nghâwngkawl hi kan bât dawn tho tho. Amah ngêi pawn, “Tu pawh ka lama țang lo chu mi do a ni; tu pawh mi lâk khâwmpui lo chuan a tidarh a ni,” a tih kha.

Hawh u, Lal Isua nghâwngkawl bâta, Amah thawhpui tûra min sâwm lai hian i thawhpui ang u.

GALATIA 5:1
Bawih ni lo tûrin Krista chuan min chhuahtîr kha; chutichuan, ding nghet ula, bawih nghâwngkawlah chuan tâng leh tawh suh u.

avatar
6 Comment threads
0 Thread replies
0 Followers
 
Most reacted comment
Hottest comment thread
6 Comment authors
Albert K. SimteHmuniVL. LianaPuiaMapuia Recent comment authors
  Subscribe  
newest oldest most voted
Notify of
K.Lalrinfela
Guest
K.Lalrinfela

A ropui hle mai…Tam thei ang berin chhiar se a duhawm e. Chhiar liam mai lova, zawm ngei tumin.

Mapuia
Guest
Mapuia

A van ṭha ṭhin tak em👍🏻 hlawkpui nan kan lo hmang ania Lalpan malsawm che u rawh se🙏🏻

Puia
Guest
Puia

atha kati

VL. Liana
Guest
VL. Liana

a thain a ropui hle mai

Hmuni
Guest
Hmuni

athu in a a rawn teh khin hi atha hle mai

Albert K. Simte
Guest
Albert K. Simte

a va dik in ava tha em. Rawn ziak zel te khai

Copyright © 2017-2020 Our Daily Bread Mizo.
Privacy Policy