KA THU I AWIH TÂK AVANGIN

GENESIS 22:10,16
Tin, Abrahama chuan a kutin a ban a, a fapa tihhlum nân chemtê chu a la a. “He thil hi i tih tâk avâng leh i fapa, i neih chhun tak pawh i ui loh avângin mal ka sâwm ngei ngei ang chia,”.

Pathianin Abrahama inthâwina hlân tûra a hrilhna hmun Moria tlâng hi an awmna aṭanga ni 3 zet kal a ni a, kalkawngah pawh inngaihtuah ṭhat leh a, rilru thlâk leh theih tak tûr pawh a ni.

Kan thil hmuh leh hriatte hian hawi kîra hmalam pan lova kîr leh duhna min siam fo ṭhin. Sari leh a chhiahhlawhhote bâkah a bul vêla hnam dang hovin engtin nge an ngaih ang? A rilruah zawhna a tam âwm e. Abrahama’n Pathian thu a âwihna hi a ropui hle, a hnên aṭangin zir tûr kan va ngah êm!

Halral thil hlanna hmunah chuan,
Thia inhlan a ngai si a;
Kan mihring hlui nung reng chung chuan
Lalpa’n a pawm thei si lo.

Abrahama anga Pathian thu âwih tlattu nih i tum ang u.