NU PAWIMAWHNA

THUFINGTE 31:11-12
A pasal thinlung chuan a ring a, chhawrna a hmai lo vang. A dam chhûngin chhe lam ni lovin, ṭha lam hlîrin thil a tihsak ṭhîn.

Chhûngkaw tam bera hmun laili ber luahtute chu nute hi an ni. William Carey-an, “Chhûngkaw hlimna chabi kawltu chu nu hi a ni,” a lo ti hial rêng a ni.

Chhûngkua tinuamtu, timawitu, tizahawmtu leh uap lumtu chu nu hi a ni a. Inlêng leh mikhual hmaa chhûngkaw dârthlalang târtu a ni. Nu hlutna hi hmuh theih khawvêl thilah a hen zo pakhat mah a awm lo. Napoleon-an, “Nu tel lo chuan khawvêl hi thlalêr ram ro, tui awm lohna ang a ni,” a lo ti hial a. Ellen G. White-i pawhin, “Nute hian pate aiin naupang hneh theihna an nei ṭha zâwk a, an mawhphurhna hi thil thianghlim, serh leh sâng lam hawi a ni tih an hre tûr a ni. An fate an enkawlnaah hian an dinhmun hi Pathian dawttu an ni,” a lo ti hial a ni. Nute hi hlawh phût hauh lova zîng aṭanga mut hun thlenga chhûngkaw member dangte rawngbâwlsaktu an ni. A hlutzia hre pha lo nu chu a bo thui viau tihna a ni nghâl bawk.