RAM TE, THILTIHTHEIHNA TE, ROPUI TE, CHATUAN I TA A NI SI A

1 CHRONICLES 29:11
Aw Lalpa, ropuina te, thiltihtheihna te, chawimawina te, hnehna te, lalna te hi i ta a ni a; lei leh vâna awm zawng zawng hi i ta a ni si a; aw Lalpa , ram chu i ta a ni a, mi zawng zawnga chungnung ber i ni.

Lalpa ṭawngṭaina tâwp lam, a chunga kan târ lan hi Bible lehlin tam takah a awm lo va. Suria Bible-ah chuan ‘ram te leh ropui te, chatuan i ta a ni’ tiin an dah a.

Didakhe (Tirhkoh sâwm pahnihte thu zirtîr)-ah chuan ‘thiltihtheihna leh ropuina, chatuan i ta a ni’ tia dah a ni. Tûna kan hman mêk, ‘ram te, thiltihtheihna te, ropui te, chatuan i ta a ni si a’ tih hi a hmang hmasa bertu chu Tatian-a nia sawi a ni a, A.D. 160 vêla mi a ni a, Lal Davida ṭawngṭaina, a chunga kan târ lan aṭanga a phuah nia rin a ni.

Khawvêl lal ramte chu tluchhe thei leh tâwp chin nei a ni a. Pathian ram chu ram hlun, ral ve mai mai ngai lo a ni. Pathian fate kan nih avângin he ram hlun hi kan chanvo tûr a ni, kan va nihlawh tehlul êm!