ṬHALAI FING RAWH – NI TIN NUNAH

— PC Lalṭhazuala
Peniel, Hnahthial

Voter ID, aadhaar card, mobile phone kan nei deuh vek tawh a nih hi. Hêng ho hi tûnlai kan khawvêlah hi chuan kan ni tin nuna bet leh kan neih/kan tih ve ngâi a ni ta reng mai. A nia lawm… i neih a ngai, ka neih a ngai tawh tlat. WhatsApp khawihte hi kan tam tawh ti rawh u! Bible lam hawi ta ila, mi pathumte aṭangin finna kan chhar thei ang, chûngte chu i han thur chhuak teh ang.

Davida kha a hunlai khân Berâm vêngtu ni mah se, Israel-te tâna Goliatha hnehtu, mi hrâtkhawkheng, mi huaisen leh tumruh a ni.

Daniela (Beltesazzara), Hanania (Sadraka), Misaela (Mesaka) leh Azaria (Abednego) te kha Babulon sala an tânna-ah pawh khân mi thiam leh ṭha filawr, lal pawhin a duh êm êm te an ni.

Timothea, naupangtê nia Pathian thu hriltu.

Khai le, keimahni ṭheuh i inen ve teh ang u. A hunlaia ram tâna mite an phêt suau suau lai a, berâm vêngtu leh a ute chanchin ngaichânga indona hmuna kal ve chauh Davida ang lek kha kan awm nualin ka ring. ‘Lek’ kan tihho hi LALPA leh a mite tâna mi ṭangkai tak kan ni thei vek a nia.

Daniela te ṭhian zaho ang a ram inrêlbâwlnaa ke pêntu i nih pawhin kal miah miah rawh. Chu hmunah chuan rinawm leh dik, taima leh Pathian ṭih takin i awm thei a, ramin a dinchhuah phah thei che a sin.

Pathian ram tâna vâkin Timothea anga Chanchin Ṭha hriltu i nih pawhin, mite tihhmuhtu i ni thei. Pathian tân taima takin, nghet takin, tihnghîn rual lohin ke pên ang che.

Zirna kawng zawha ke pên leh hna hrang hrang thawk mêk – Ṭhalaite. Tûnlaia thil ṭul zawng zawng nei pha – Ṭhalaite. Changkânna kawngah pawh mite ruala ke pen pha – Ṭhalaite hian kan ni tin nunah fing taka awm a, Pathian ṭihna nêna awmin ke i pên ang u. Chu chuan kan ṭanhonaah te, ṭhalai huanga rawng kan bâwlnaah te, midangte nêna kan thawhhonaah te, tunlai thiamna (mobile phone, computer etc.) kan hmanna kawngahte hian rah ṭha tak a chhuah ngei ang. Vawiin aṭang hian kawng engkima LALPA hmantlâk ni tûrin – Ṭhalai fing rawh – i ni tin nunah.