GOOD FRIDAY ISSUE 3-NA

— Chhantea (Oriela patea)
East Lungdar

Isuan kross lêra thu a sawi te…

Chanchin Ṭha bu 4-in Isuan kross lêra thu a sawi 7 an sawite zînga pahnih chu kan sawi tawh a. A pathumna i lo en ho leh teh ang.

3. “Tihtakmeuhvin ka hrilh a che, vawiinah hian ka hnênah Paradis-ah i awm ve ang,” a ti a (Lk. 23:43).

He thu hi a ruala misual an khenbeh pahnih te zînga pakhat bula a sawi a ni. A ruala khenbeh pakhat zâwk khân Isua kha hau pahin a ti el a, pakhat zâwkin a hau tu chu zilhin Isua hnênah “Isu i ram i thlen hunah mi hre reng ang che” ti a a ngenna Isuan a chhânna a ni.

Ni e… Isua chu mihringte duh loh leh ensan, thing ânchhedawngah misual pahnih inkârah khenbeh ni mah se… Pathian a nihna a thuneihna leh lal a nihna chu dan theih a ni lo. Thihnain a man mêk lai pawhin amah beiseitu leh amah pantu te chu chatuana nunna a pe mai a ni.

Aw le, nang leh kei pawh hi kan sual avângin kan tuar a, kan rûm a, kan ṭap a, kan na fo ṭhin, he khawvêlah belh tûr leh damchhan tûr engmah neilo ang hiala beidawnna ten min chîm fo ṭhin ang. Chung hunah chuan Lal Isua lam hi i en ṭhin ang u. Natna hrik hlauhawm cancer, HIV, etc. ten min chiah a, kan rum ngawih ngawih em le?

Isua kianga khenbeh khian testimony sawi tûr pawhin hun a nei lo. Chumai nilovin a sualte sim tûra inlamlêt tûr pawhin a tân a hun tlêmzia kha. Mahse, last minute-ah pawh tihtak zeta amah pantu leh bêltu chu Lal Isuan a ngaidam duh a ni. Nang leh kei hian hun ṭha kan neih lai hian tih takzetin i pan ve ang u.