NANG LEH KEI VANGIN A TUAR

MATTHAIA 27:29-30
Tin, hlînglukhum an phiar a, an khumtîr a, a kut ding lamin luang an kentîr a; a hmaah an ṭhingṭhi a, “Chibai, Juda-te lal!” tiin nuihza siam nân an hmang a. Tin, amah chu chil an chhâk a, luang chu an lâksak a, a luah chuan an vua a.

Krawsa inkhenbeh hi Persia hoten lo hmang ṭanin North Africa lamah an la chhâwng a, Rom hovin an lo chîng ve leh ta nia sawi a ni. Rom ho hian an khenbeh tûrte chu thîr banah an kut ṭawnsakin, vuakna hruihrual, a hmâwra thîr zum kawm vuahin nasa tak leh hrehawm takin chau hnêpin an sawisa ṭhin.

Isuan sawisak, tih-el leh nuihzat a tuar hi thil a tihsual vâng ni lovin nang leh keima sual tlan nân tuar a ṭul vang chauh a ni. Keini pawh amah kan zui chuan kan tuar a ṭul hun a la thleng thei. Kan tâna tuartu tân hian tuar kan huam ngei tûr a ni. A thu anga nun kan tum chuan pâwn lam aṭang mai ni lovin chhûng lam aṭang pawhin tuarna, tihelnate pawh a thleng thei a ni.

Ka thiltihsualte avângin,
Kraws chungah a rûm a;
Khawngaihna leh hmangaihnain,
Min pe – chatuan nunna.

LALPA, i hniak hnung zui tûrin min pui ang che.