DIABOLA DODÂL RAWH U

JAKOBA 4:7-8
Pathian thu thuin awm rawh u; amaherawhchu, Diabola dodâl rawh u; tichuan, a tlân bosan ang che u. Pathian hnaih rawh u; tichuan, anin a hnaih ang che u.

Ni tin thlêmna kan tâwk a, ṭha en mai lovin i dodâl ang u (1 Pet 5:8-9). Pathian thu – thlarau ngûnhnâm (Eph 6:17) hi kan râlthuam pawimawh tak a ni tih hi i hre reng ang u. Mahni chakna mai chuan kan hneh theih loh zia kan hmu (Rom 7:15-20). Pathian râlthuam famkima kan dodâl a ṭul (Eph 6:10-18).

Setana chhân lêt nân a tam thei ang ber Pathian thu kan vawn belh a ṭûl. Pathian kan hnaih (Jak 4:8) hi a ṭûl khawp mai. Isua bulah a chakna ringin hmêlmapa kan do hneh thei dâwn a ni. Pathian biak inkhâwm, chhûng inkhâwm leh Bible chhiar uar deuh deuhin Setana i do zêl ang u.

Râl hlauhawm tak kan tâwng naa,
Puitu a hnaih chu;
Bei r’u, kan Lal a lo kal e,
Pâwlte u, lâwm r’u.

LALPA, Diabola dodâl tûrin chakna min pe ang che.