ṬAWNGṬAI

SAM 32:6
Chu vâng chuan, Pathian ngaihsak mi tin chu zawn hmuh awla i awm laiin i hnênah ṭawngṭai ṭheuh rawh se; Tui liante chu a lo liam hun chuan anni chu a chîm pha ṭhuai dâwn lo nia.

Bible-ah hian ‘ṭawngṭai’ tih leh ‘ṭawngṭaina’ tih hi vawi 214 vêl lai kan hmu a. Hei hian Pathianin ṭawngṭai a ngaih pawimawhzia a târ lang chiang hle mai! Juda-ho hi ni tin vawi thum an ṭawngṭai ṭhîn.

He khawvêla lal leh rorêltute chuan anmahni betute sawi zawng zawng an hre reng thei lo va, an mamawh an pe vek thei hek lo. Lalpa chuan a kotu zawng zawng a hre vek a, an mamawh a pe thei vek bawk. Ṭawngṭai hi a pawimawhna hre reng siin peih loh mai a awl hle. Chadwick-a chuan, “Khawvêlah hian ṭawngṭai mi hi an ropui ber a. Thil mak deuh chu – hre reng siin mihring hi a ṭawngṭai chuang lo,” a ti a, a dik thui hle âwm e. Finney-a chuan, “Ṭawngṭaina hian Pathian a tidanglam lo va, keimahni min tidanglam a ni,” a ti. I ṭawngṭaina khân nangma lamah danglamna a thlen ve tawh che em?