SETANA

THU PUAN 12:9
Tin, dragon lian pui, rûlpui tar, Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a.

Setana hi a tîrah chuan Pathian vântirhkoh chungnung ber zînga mi a ni a. A nihna duh tâwk lovin Pathian lalṭhutthlêng a chuhpui a, vân indona a lo awm a, amah leh a lam ṭangte nên leiah paih thlâkin an awm ta a ni (Is. 14; Eze. 18; Jud. 6; Thup. 12:1-17).

Setana sawina hming chi hrang hi 25 chuang zet a awm a, a ṭhen chu – sual tinrêng pa, hmêlma pa, thlêmtu, thim thuneihna lalpa, nun râwng, sawichhetu tih te a ni a. Setana hian thlêmna te, sualna te, hêkna te, bumna te, tihduhdahna te, dodâlna te, thatchhiatna te, hurna te, chapona te, îtsikna te, uanna te, mut tui lohna te, nunrâwnna te, mi dang leh mahni nunna lâk duhna te, thinchhiatna te, duhâmna te, kam tam te, mumang hmang te, hlauhna te, chaw ei tui lohna te leh thil dang dang hmang tein mi a bei ṭhin a. A râlthuam a tung ve mai mai ngai lo va, chhum lo chat lovin min tihchhiat tumin a ho ramhuaite nên mi an bei ṭhin. Min bum loh nân i fîmkhur ang u.