THUTIAMA RINAWM – HANI

1 SAMUELA 1:11
Tin, thu a tiam a, “Aw Sipaihote Lalpa , i bawihnu tlâwmzia hi min hriatsak takmeuhva, min hriat renga, i bawihnu hi min theihnghilh lohva, i bawihnu hi fapa i pêk chuan, a dam chhûng zawng Lalpa ka pe ve thung ang a, a lu pawh meh rêng rêng a ni lo vang,” a ti a.

Hani hi Elkana nupui pahnih zînga pakhat zâwk a ni a. A chin avângin Elkana nupui pakhat zâwk Penini chuan a hmusit hlê a. Hani chuan țhahnemngai takin Pathian hnênah fa a dîl a, a dîl anga Pathianin a pe a nih chuan Pathian hnêna a dam chhûnga rawngbâwl tûra pêk lêt ve leh a tiam a. Ṭhahnemngai taka Pathian a dîl chu pêkin a awm ta a, a intiam ang ngeiin hnute hnêk a bân hnuah Pathian tân a hlan a, puithiam Elia bulah a khawsa ta a. He mi hnu hian fapa pathum leh fanu pahnih Pathianin a pe leh a ni (I Sam. 2:21).

Pathian hnêna a thutiama Hani rinawmna chuan Israel-ho tân malsâwmna thlentuah a siam a. A fapa Samuela chuan Israel-ho chanchinah dinhmun pawimawh tak a luah ta a. Amah ngei pawhin fa panga lai a nei leh nghe nghe a ni.