ZÛK LEH HMUAM A ṬUL LOVA SUM SÊNNA

ISAIA 55:2
Chaw ni si lovah eng vângin nge tangka in sên? Puar leh fânna ni si lovah eng vângin nge in tha in sên?

Hlâwkpuina sawi tur awm ahnêka a tlaran zâwnga kan inhmanna tam zâwk chu zûk leh hmuamah hian a ni. A lei nâna kan sum sên bâkah taksaa chak lohna leh natna a thlen tihdam leh nân sum tam zâwk hman a ṭûl ṭhin. Zirchiangtute sawi dânin kum 2003-2004 vêl khân Mizorama zûk leh hmuam atâna kan sum sên dân hetiang hi a ni – Meizial-ah chêng nuai 5,475; Khaini-ah nuai 1,800; Sahdah-ah nuai 1,400; Tuibûr-ah nuai 912; Pânkhâwr-ah nuai 2,600; a vaiin nuai 12,187.

Chhûngkaw ṭhenkhat chuan thla khat chhûngin zûk leh hmuamah Rs. 4000 thleng te pawh pawisa an lo sêng nia! Mahni hlawh tihpun duha nawr nawr ai chuan zûk leh hmuam bânsan mai hi hlawh tihpunna ṭha tak a lo ni. Zûk leh hmuam kan tih loh hian thla khatah chêng tam tak kan hlawh a lo ni reng mai. Chhûngkuaa tih loh theih phei chu a man a va tam dâwn êm!