ISUA KHAWVÊL ÊNTU

JOHANA 8:12
Tin, Isuan an hnênah thu a sawi leh a, “Kei khawvêl êntu ka ni; tu pawh mi zui chu thimah a lêng tawp lo vang a, nunna êng a nei zâwk ang,” a ti a.

Bawhchhiatna avângin khawvêl chu Pathian hriat loh thimnain a tuam a. Amah hre tawhte pawhin hawisanin a siamtu ni lovin a thil siamte an bia a. Pathianin zahthlâk taka hur phalin a hawisan a, suahsualna zawng zawngin an lo khat a (Rom 1:18-22).

Chutianga khawvêl thihna thim hnuaia a ṭhut lai chuan, “Kei khawvêl êntu ka ni, tu pawh mi zui chu thimah a lêng tawp lo vang, nunna êng a nei zâwk ang,” tiin Lal Isuan a rawn sawi ta a ni. Mahni sualna leh dik lohna pawh hmu thei hauh lova thima kan ṭhut laiin Lal Isuan min chhun êng a. Chu êngah chuan kan lo inhmu fiah ve ta a. Amah ngei pawhin, “Khawvel êng in ni e,” min lo ti ve ta zâwk a ni (Mt. 5:14a). A va lawmawm êm!