PA ENTAWN TLÂK JOBA

— Chhantea (Oriela patea)
E. Lungdar

PA ENTAWN TLÂK JOBA (KRISTIAN CHHÛNGKUA)

JOBA 1:5
Tin, chutia an ruaiṭhehte an zawh hnuah chuan Joba chuan anmahni a ko va, a thian hlawm a; zîng takah a tho va, an zaa hming kimin hâlral inthawi a hlân a. Joba chuan, “Ka fapate hian thil an lo tisualin Pathian an lo sawichhia a ni mahna,” a ti a ni. Joba chuan hetiang hian a ti ziah ṭhîn a ni.

Joba chungchâng kan sawi hian Pathian mi rinawm fiahna leh tuarna tinreng paltlang a nihna te, a tâwp lamah meuh chuan Joba’n a sim tâk thu te hi kan sawi tui em em a ni ṭhîn. A ṭhiante pathum nêna an han inchhân vêlna leh Pathian nêna an inbiakna te phei hi chu a ngaihnawm êm êm a ni.

Tun ṭumah erawh chuan Joba hi a entawn tlâkna tam tak zîngah kristian chhûngkaw lam hrûtin hetiang hian sawi kan tum dâwn thung a ni.

Joba kha Pathian phalna hmanga Setana’n kut a thlâk hma hauh pawh khân Pathian hmaa mahni fate kûnpui ṭhin pâ a ni. Pathian malsawmna tam tak a dawn zia lah kan Bible-ah kan hmu a, Pathian meuhin, “Lei chungah amah ang a famkim, mi ngîl, Pathian ṭih mi, thil ṭha lo laka insûm thei tu mah an awm lo asin,” (Job 1:8) a tih a ni. Ama tân mai ni lovin a fate tân pawh Pathian tân a hâlral thil hlan hlân a Pathian hmaa thian thianghlim fo mi, pa ropui a ni.

Joba ang hian kristian chhûngkuaa pa ber ten kan nupui fanaute tâna Pathian hmaa ding ngam ringtu nih hi a va han ṭûl tak êm. Khawvêl sualna sâng zêlah hian kan faten nun kawng dik an zawhna tûrah hian pâ hi kan va pawimawh êm!

Pathianin a thu malsâwm rawh se.