CHUNGPIK ṬHINTE 1-NA
HABAKUKA 2:15
A ṭhenawm hnêna zu in tûr petu chu a chung a pik e, Nang, an saruak i hmuh theih nâna i tûr chawhpawlha tiruitu chu!
Kristian ram tia chhuang taka kan sawi ṭhin, Mizoram-ah hian zu zuar an tam hle. Zu khap burna dân pawhin awmzia a nei meuh lo niin a lang. Tlang taka sawi chuan zu zuarte hi kan hmangaih ngawih ngawih kan pasal te, kan nupui te leh kan fate nunna min chhahsaktute an ni a. Nupa nun hlim taka hmantîr thei lotu leh chhûngkua hlim thei lova siamtute an ni bawk.
A pawi ber chu kan Bible meuhvin chung pik an nih thu a sawi hi a ni a. Anmahni chhanchhuaha an awm theih nan chak taka hma lâkpuia, ṭawngṭaina pawh tam tak neihpui an mamawh hle. An eizawnna han thlâk maina tûrte hi an tân pawh hriat a har thei a, kawng indappui pawh a ṭul ṭhin. Kan chhungkua hian kan vêng leh kan khuaa zu zuarte hi kan ṭawngṭaisak tawh ṭhin em le?
