EPHESI KHAW BUAINA

TIRHKOHTE 19:26b-27a
Paula hian, ‘Kuta siam pathiante hi Pathian an ni lo,’ tiin mi tam tak a thlêm thlu a, a pakaitîr zo tawh a ni tih nangni ngei pawhin in hmuin in hre bawk a; chutichuan, kan hnathawh a lân ang tih a hlauhawm chauh hi a ni lo va, pathiannu ropui tak Diani biak in pawh hi an rawn ngai tlâwm ang”.

Ephesi khua hian chi thlahna pathiannu Artemis (Grik) an tih, Diana (Latin) an tih bawk temple ropui leh mawi tak chu an lârpui hle. Temple hi hman lai huna thil mak pasarih zînga chhiar tel a ni. Ephesi mi Demetria, tangkaraw hmanga Diani lem siamtu chuan Paula zirtîrna avânga Diani biak in an rawn ngaihnêp a hlauhawmzia a sawi chuan mite chu an thinur a. Gaia leh Aristarka pawh an man phah hial a ni.

Sum leh pai duh luat avâng hian Chanchin Ṭha kan hnar ang tih a va hlauhawm êm! Mi fel tak, tlangval hausa pawh khân Isua a zui theih lohna chhan chu sum vâng a ni (Mt. 19:22).

Lalpa, sum ka ngainêp a,
Rangkachak tangka nên;
Vânram chu ka thlang zâwk e,
A chhûnga ka luh nân.

Sum leh paiin Isua i thleng lo hrâm ang u.